“Jereki Enggau Populariti Enda Datai Ngelawa” - Helen Letteny

Dikarang: Isa Lee

“Ba aku, biar meh kitai nambahka pengelandik ba diri empu dulu sebedau bemimpika populariti. Populariti semina nasit lalu manah amat enti iya datai ari ‘bakat’ kitai ke tulin. Aku mega arapka semua orang enda luki’ bekunsika penemu diri lalu beri meh peluang enggau sukung ngagai orang ke baru ba dunya pemerindang laban orang ke dulu patut ngiring sida ke dudi” – Helen Letteny

Enti bisi batu ilau baka manang enggau tisik baka manuk, nyau ga nilik diri, enda pia? Taja munyi ke muntang dikereja tang pengawa nya ukai chamang-chamang laban  orang ke nyadi manang ba jeman tu nyau mimit semimit lalu sida ke amat-amat nemu macha tisik manuk mega majak kurang.  Iya ti bendar, kitai mensia mayuh agi ngarap sambil nyikap diri ngena penemu ngambi bulih ungkup ke pemadu manah kenu ku ati diri.  

 Ku orang, jereki bisi ba sebarang maya enggau sebarang alai. Nya sigi amat taja kitai nemu kitai mensia semina ulih merambu tang Tuhan ti nentuka semua utai ke patut ulih kitai. Mensia ke mujur nya sida ke liat ati, enda mudah patah ati ketegal orang ti kepapas, rajin lalu semampai meda utai ke manah (positif) ba pengidup diri. Sida ke popular mega ukai tak terus popular dalam sehari dua pia aja laban sida dulu nujah andau penguji enggau abis pengempang enggau pemerani ati sida. Ba orang ke sigi keran ati deka mujur,  andau penguji nya meh entara jalai ke mesti ditujah laban nengah jalai nya jereki sida nyangka bisi nganti.      

Betemu baru bala pemacha di dipebasa ! Minggu tu kitai begulai baru enggau siku personaliti dara manis ke baru beumur 21 taun. Helen Letteny madahka penatai diri ari Lundu (muak ari apai) lalu indai iya bansa China datai ari Betong. Helen Letteny baru udah nembuka pelajar Diploma Eco-Tourism ari International College Advanced of Technology Kuching tang diatu agi gawa sementara ba siti hotel di Bandaraya Kuching.  Nitihka pematut ku Helen, iya diatu ngambi pelajar degree nyambung kus iya nya tang laban agi bisi penanggul ti enda ulih diseliah, iya gawa dulu sambil ngiga belanja ke diri empu.

Pengerindu Maya Lepa

Maya lepa, Helen rindu agi diau di rumah, macha bup kelebih agi bup ke besangkut-paut enggau fesyen. Kelimpah ari nya, Helen merindang ati diri nulis lirik lagu, bemain gitar enggau ngadap internet. “Kadang-kadang aku ngiga pansik kediri pasal muzik, fesyen enggau dunya ‘modeling’. Dia aku tau bulih penemu baru lalu ba pekara bukai aku mega ulih nemu utai ke pemadu baru tauka ‘latest trend’ dunya maya ke diatu”, ku Helen ngenang chara iya ngisi maya lepa.

Muzik & Lirik Lagu

Taja baru belajar bemain muzik,  Helen diatu udah ulih ngarang leka lagu ngena ‘simple chord’ gitar ke udah ditemu iya. “Pengawa ngarang leka lagu endang pengerindu aku kenyau ari suba. Aku rindu agi ngaga lirik lagu ari belagu. Aku agi ingat amat maya aku agi primari enam suba ke alai aku diansak bala pangan aku enggau masuk pekit belagu. Aku mansal diri laban enda pechayaka diri ulih menang tang engka udah jereki diri, aku bulih lumur satu; siti utai ke aku empu pan enda tentu pechaya.  Nya meh siti kenang ti tau ngasuh aku geli ati lalu datai ke diatu aku nganggap cherita nya siti utai ke chukup berega laban taja diri empu baka ti dikeduan, aku bisi kenang ke chukup berega”, Helen mulaika pengingat jeman sekula ke ba penemu iya tetap enda ulih ditarit pulai baru.

Helen ukai semina rindu ngarang leka lagu tang iya mega rinduka pengawa ‘modeling’. “Sapa madahka pengawa ‘modeling’ enda mai penguntung. Ba aku, nyadi model tau nambahka penatai pemisi diri tauka ‘side income’ laban pengawa nya dikereja maya kitai ke enda ngereja batang pengawa diri. Kelimpah ari nya, pengawa nyadi model mega meri kitai peluang bekelala enggau orang baru, enda ngira asal penatai, bansa tauka budaya sida. Ba kitai ke indu, kaul ke bansa nya tau bendar nempa pemanah penemu maya kitai ke begulai enggau orang”, Helen sekali agi bekunsika penemu diri sambil madahka iya lebih pechaya ba diri empu pengudah iya ke begulai enggau mayuh bansa orang.

Idola Ngarang Lirik Lagu

Helen ke diatu agi ngiga identiti diri ba dunya pemerindang,  madahka iya tetap temegah enggau artis ke udah dulu mujur. Kebuah pia ku iya laban iya bisi chunto enggau teladan ke patut dititihka iya. “Ba pekara ngarang leka lagu, idola aku iya nya Sulu Sarawak; siku indu kitai Iban ke benung pegari nama di Semenanjung Malaysia ke nulis lirik lagu ke penanyi popular nyengkaum Kaer AF enggau artis ke bukai. Mayuh agi lirik ke digaga aku besangkut-paut enggau cherita idup bujang dara kelebih agi ba sida ke benung nanggam pengerindu enggau pangan diri. Kelimpah ari nya, sekeda leka lagu aku tau nyadi ke peransang”,  ku Helen ke lalu madahka diri bisi enggau orang masuk kelas belakun ke diatur Kamek Empun Production begulai enggau Perbadanan Kemajuan Filem Malaysia.

Ditanya kini iya deka mai semua lirik lagu ke udah digaga iya, Helen madahka  pekara nya ukai nyadi penanggul laban iya tau disimpan lalu tambah mega iya diatu baru deka nguji ngerikut nyawa diri ba CD nyangka icha tau nyadi album ‘single’ baka ke suah dipeda kitai ba YouTube.

Wooww..manah ga perambu enggau juluk ati Helen nya. Uji kitai beratika jaku sempama tu, “Kalau tak pecahkan ruyung, mana dapat sagunya”. Jaku nya endang iya amat laban enti kitai enda bebendar deka ngubah diri, tentu ga kitai nadai utai ulih; munyi ku topik karang di atas tu tadi.  Kitai arapka Helen tetap enda leju belajar sereta ngulihka penemu,  enda milih bansa seni laban enti kitai amat bebendar deka ngemansangka diri, dudi hari ila tentu ga kitai ulih meda asil iya.

Muzik Dikerindu

Helen rinduka muzik pop balada enggau ‘dance pop’. Taja pia ku iya, iya rindu agi mendingka muzik akaustik. “Naka ke diatu aku udah bisi nyimpan lirik lagu ke udah bisi melodi lalu sekeda nya semina lirik iya aja. Ari ‘perspektif’ peminat enggau peninga lagu Iban, lagu ke manah nya lagu ke nyelai ari lagu bukai. Enti melodi, muzik enggau lirik iya bisi nyelai didinga, nya nandaka lagu nya bisi ‘aura’ enggau ‘kreativiti’kediri. Enti kitai beratika lagu ti dikerinduka bala peninga, lagu ke enda kelalu nunda gaya lagu orang bukai bisi peluang nyadi popular. Ari atas semua nya, lirik lagu nya siti elemen ke pemadu beguna laban iya mai pesan ke beguna ba semua orang”, Helen sekali agi enda luki’ bekunsika penemu diri taja tudah tuai nemu diri agi kelalu baru ba dunya pemerindang.

Pengarap Ba Industri Muzik

“Enti bebanding enggau chara sida di Semenanjung, artis kitai Dayak di Sarawak ditu semina ulih ngayanka diri ba CD / VCD enggau YouTube. Kitai bedau tentu ayan ba TV baka sida din. Nya siti ari kebuah kitai enda tentu ulih mansutka diri lalu nya mega siti ari kebuah dunya pemerindang kitai ditu lubah ngerembai sereta lubah mega mansang”, Helen meri komen berindik ari utai ke endang amat nyadi dipeda iya.

Bujang Dara Ke Benung Besulu

Manis enda semesti madu lalu pait ukai gerinti empedu. Baka nya pengidup kitai mensia ti kadang-kadang disangka lantang tang tau ga tetemuka penusah laban ba tiap-tiap utai ke nyadi tetap bisi utai bukai ke enda disadang.

“Ba aku, besulu sigi enda salah. Taja pia, mayuh ga kitai nguna peluang nya enggau chara ke enda tentu betul. Sekeda lalu beambi-ulih enggau pangan diri lalu sekeda tetap enda peduli laban ati udah kelalu rindu. Sida enggai tentu dirara apai indai ti ngujungka sida rari ari rumah. Kitai sama arap, kelebih agi kitai ke indu patut nemu nyaga diri laban sekali telanjur singkang, iya tetap enda ulih batak pulai baru”, ku Helen ke enggau chukup semadi meri lalau pasal isu besulu laban ngasaika diri agi bela begunaka sukung enggau iring apai indai enggau orang ke semak enggau iya.  

Ditanya senentang sulu ati iya empu, Helen enggai bula madahka diri empu nadai sulu. Taja pan pia ku iya, nya semina cherita lama laban diatu iya deka numpu ba pekara ke lebih beguna ba pengidup iya empu. Enti ulih ku iya, bepangan biar seribu tang ambi siku nyadi ke sulu.

Simpul

Helen ke benasit manah laban bisi sukung ari sida sebilik, madahka populariti ba dunya pemerindang tu enda datai ngapa enti kitai semina ngarap. “Ba aku, biar meh kitai nambahka pengelandik diri empu dulu sebedau bemimpika populariti. Populariti semina nasit lalu manah amat enti iya datai ari ‘bakat’ kitai ke tulin. Aku mega arapka semua orang enda luki’ bekunsika penemu diri lalu beri meh peluang enggau sukung ngagai orang ke baru ba dunya pemerindang laban orang ke dulu patut ngiring sida ke dudi”, ku Helen Letteny ngujungka randau kami duai.

Arapka Helen terus nyingkang nyapai utai ti dijuluk laban juluk nya ukai mimpi enti kitai rajin, sabar sereta pechayaka diri laban amat munyi ku motto idup iya empu, “…..mesti gawa bebendar lalu anang ngarapka utai datai ngelawa”.